പാവറട്ടി: നല്ല നാളേക്ക് നാടിന്റെ നന്‍മക്ക് എന്ന തലക്കെട്ടില്‍ ഉദയം പൂവത്തൂര്‍ നടത്തിവരുന്ന ലഹരി വിരുദ്ധ കാമ്പയിന്റെ ഭാഗമായി ഞായറാഴ്ച പൂവത്തൂരില്‍ പൊതുസമ്മേളനം സംഘടിപ്പിക്കുമെന്ന് ജനറല്‍ കണ്‍വീനര്‍ ആര്‍.പി.റഷീദ് മാസ്റ്റര്‍, ചെയര്‍മാന്‍ ഡോ. പി.എ. സെയ്തു മുഹമ്മദ് എന്നിവര്‍ വാര്‍ത്താ സമ്മേളനത്തില്‍ അറിയിച്ചു.
കഴിഞ്ഞ ഫെബ്രുവരിയില്‍ ആരംഭിച്ച ലഹരി വിരുദ്ധ പ്രചാരണത്തിന്റെ ഒന്നാംഘട്ട പരിസമാപ്തി കൂടിയാണ് പൊതുയോഗം. വൈകുന്നേരം നാലിന് പൂവത്തൂര്‍ കസ്‌വ ഹാളില്‍ ഡോ. സുകുമാര്‍ അഴീക്കോട് ഉദ്ഘാടനം ചെയ്യും. ജമാഅത്തെ ഇസ്‌ലാമി ജില്ലാ പ്രസിഡന്റ് ഇ.എം. മുഹമ്മദ് അമീന്‍ മുഖ്യപ്രഭാഷണം നിര്‍വഹിക്കും. ലഹരി വിരുദ്ധ പ്രചാരണത്തിന്റെ ഭാഗമായി വിദ്യാര്‍ഥികള്‍ക്കായി നടത്തിയ രചനാ മല്‍സരവിജയികള്‍ക്ക് പി.എ.മാധവന്‍ എം.എല്‍.എ സമ്മാനങ്ങള്‍ നല്‍കും. പട്ടണങ്ങളിലും ഗ്രാമീണ വഴികളിലും പോസ്റ്റര്‍ പതിച്ച് ആരംഭിച്ച പ്രചാരണത്തിന് വന്‍ ജനപിന്തുണയാണ് ലഭിച്ചത്. തുടര്‍ന്ന് സംഘാടകര്‍ 30 കേന്ദ്രങ്ങളില്‍ പൊതുയോഗം സംഘടിപ്പിച്ചു.
ലഘുലേഖ വിതരണം, കാര്‍ട്ടൂണ്‍ പ്രദര്‍ശനം എന്നിവയും പരിപാടിയുടെ ഭാഗമായി സംഘടിപ്പിച്ചു. വിദ്യാര്‍ഥികള്‍ക്കായി നടത്തിയ രചനാ മല്‍സരത്തില്‍ 258 വിദ്യാര്‍ഥികളാണ് പങ്കെടുത്തത്. ഇതിനു പുറമെ അധ്യാപകരെയും വിദ്യാര്‍ഥിളെയും രക്ഷിതാക്കളെയും ഉള്‍പ്പെടുത്തി ചര്‍ച്ചയും തിരഞ്ഞെടുത്തവര്‍ക്കായി കൗണ്‍സലിങ്ങും സംഘടിപ്പിച്ചതായി കാമ്പയിന്‍ കമ്മിറ്റിയംഗം എ.വി. ഹംസ മാസ്റ്റര്‍ പറഞ്ഞു.
