മുല്ലശ്ശേരി: ബ്ലോക്ക് ഡിവിഷനില് ആരോഗ്യവകുപ്പ് അധികൃതര് വ്യാപകമായി റെയ്ഡ് നടത്തി. ബേക്കറികള്, ചിക്കന്ഷോപ്പുകള്, ഹോട്ടലുകള്, സ്റ്റേഷനറി കടകള് എന്നിവയിലാണ് റെയ്ഡ് നടത്തിയത്. 49 ഓളം സ്ഥാപനങ്ങളില് റെയ്ഡ് നടത്തി. 18 കേന്ദ്രങ്ങളില് നിയമ നടപടിയുടെ ഭാഗമായി നോട്ടീസ് നല്കി. 100 ഓളം ഡേറ്റ് ഇല്ലാത്ത ഭക്ഷ്യവിഭവങ്ങളുടെ പാക്കറ്റുകളും പഴകിയ ഭക്ഷണപദാര്ത്ഥങ്ങളും കണ്ടെടുത്തു. ഹെല്ത്ത് സൂപ്പര്വൈസര് കെ.എസ്. രാമന്, എച്ച്.ഐ.മാരായ എന്.എന്. ബഷീര്, വി.ബി. കൈലാസ്, പി.സി. മനോജ്, വി.ജെ. ജോബി, ഗിരീഷ്, കെ.എ. യതിന്, യു.എസ്. സുധീര് എന്നിവര് നേതൃത്വം നല്കി.
കേരളത്തിന്റെ സാംസ്കാരിക നഗരിയായ തൃശ്ശൂരില് നിന്നും ഇരുപത്തിനാല് കിലോമീറ്റര് പടിഞ്ഞാറ് നീങ്ങി, വെങ്കിടങ്ങു പഞ്ചായത്തിന്റെ തെക്ക് പടിഞ്ഞാറ് അതിര്ത്തിയാണ് കോടമുക്ക് എന്ന കൊച്ചു ഗ്രാമം. മൂന്നു ഭാഗവും പുഴകള് കൊണ്ട് ചുറ്റപ്പെട്ടു കിടക്കുന്ന പ്രകൃതി രമണീയമായ ഈ ഗ്രാമത്തിനു, ഈ പേര് വന്നതും ഈ പുഴകളുടെ സാമിപ്യം തന്നെയാണെന്ന് പറയപ്പെടുന്നു. കണ്ടശ്ശാം കടവില്നിന്നും ചേറ്റുവ അഴിമുഖത്തേക്ക് ഒഴുകുന്ന പുഴയും, പീച്ചി അണക്കെട്ടില്നിന്നും ഏനാമ്മാവ് (കെട്ടുങ്ങള്) ബണ്ട് വഴി തുറന്നു വിടുന്ന വെള്ളവും തമ്മില് സംഘമിക്കുന്ന ഭാഗമാണ് കോടമുക്ക് പുഴ എന്നറിയപ്പെടുന്നത്. കിഴക്ക് നിന്നും, തെക്ക് നിന്നും ഒഴുകി വരുന്ന ഈ പുഴവെള്ളം അല്പം പടിഞ്ഞാറോട്ടും, പിന്നീട് വടക്കോട്ടും ദിശ തിരിഞ്ഞു ഒഴുകുന്നതിനാല് ഒരു പ്രത്യേക തരം ചുഴിയും അടിയൊഴുക്കും ഈ ഭാഗത്ത് ദൃശ്യമാവാറുണ്ട്. മാത്രവുമല്ല, തെക്ക് നിന്നും കിഴക്ക് നിന്നും ഒഴുകി വരുന്ന ചണ്ടിയും, മട്ടും, കോടയുമെല്ലാം ഈ കോടമുക്ക് പുഴയുടെ തെക്കേ കരയില് കുമിഞ്ഞു കൂടുക പതിവായിരുന്നു മുന്കാലങ്ങളില്. അങ്ങിനെ 'കോട' കുമിഞ്ഞുകൂടുന്ന ഒരു 'മുക്ക്' എന്ന വിശേഷണത്തില് പുഴയുടെ ഈ ഭാഗം അറിയപ്പെടുകയും പിന്നീടത് കോടമുക്ക് ആയി മാറുകയും ചെയ്തു. ഈ പുഴകൊണ്ട് ചുറ്റപ്പെട്ടു കിടക്കുന്ന ഒരു ഗ്രാമമായതുകൊണ്ട് ഈ പ്രദേശത്തെ 'കോടമുക്ക്' എന്ന പേരില് അറിയപ്പെടാന് തുടങ്ങി.