വാടാനപ്പള്ളി:പ്ലാസ്റ്റിക് മാലിന്യവും പഴയ മരുന്നും കത്തിച്ചത് ശ്വസിച്ച വിദ്യാര്ത്ഥികള്ക്ക് ഛര്ദിയും തലവേദനയും ശ്വാസംമുട്ടലും. ചേറ്റുവ ജി.എം.യു.പി. സ്കൂള് വിദ്യാര്ത്ഥികള്ക്കാണ് അസ്വസ്ഥത അനുഭവപ്പെട്ടത്. 12 കുട്ടികളെ ചേറ്റുവ എം.ഇ.എസ്. ആസ്പത്രിയില് പ്രവേശിപ്പിച്ചു. ഇവരില് ഒമ്പതുപേരെ പ്രഥമ ശുശ്രൂഷക്കുശേഷം വിട്ടയച്ചു.
ബുധനാഴ്ച രണ്ടുമണിക്കാണ് സ്കൂളിനടുത്ത സ്വകാര്യ വ്യക്തിയുടെ പറമ്പിലാണ് പ്ലാസ്റ്റിക്കും പഴയ മരുന്നും ഫര്ണീച്ചര് അവശിഷ്ടവുമെല്ലാം കത്തിച്ചത്. കൂടുതല് കുട്ടികള്ക്ക് ബുദ്ധിമുട്ടനുഭവപ്പെട്ടതോടെ കുട്ടികളെ ക്ലാസ് മുറികളില്നിന്ന് പുറത്തിറക്കി. വിവരമറിഞ്ഞ് സ്ഥലത്തെത്തിയ പൊതുപ്രവര്ത്തകന് ഇര്ഷാദ് കെ. ചേറ്റുവയുടെ നേതൃത്വത്തില് കൂടുതല് അസ്വസ്ഥത കാട്ടിയ വിദ്യാര്ത്ഥികളായ മുബഷിറ, നാജിയ, ബബിത, സഫ്വാന്, ഫര്സാനമോള്, ആരതിരാജ, സാന്ദ്രബാബു, മിസിരിയ, വിസ്മയ, മുബീന, ഷിജു, റമീഷ എന്നിവരെ ആസ്പത്രിയിലേക്ക് മാറ്റി. പഞ്ചായത്ത് പ്രസിഡന്റ് ശുഭ സുനില്, അംഗങ്ങളായ സുമയ്യ സിദ്ധിഖ്, ലസിക, എ.സി. സജീവ്, വിനിത, പൊതുപ്രവര്ത്തകരായ എം.എ. ഹാരിസ്ബാബു, യു.കെ. പീതാംബരന് എന്നിവര് ആസ്പത്രിയിലും സ്കൂളിലുമായെത്തി. വിവരമറിഞ്ഞ് നൂറുകണക്കിന് പേരാണ് ആസ്പത്രിയിലെത്തിയത്. സംഭവത്തെക്കുറിച്ച് പോലീസ് അന്വേഷണം നടത്തുന്നുണ്ട്.
