പാവറട്ടി: ആത്മവീര്യം വീണ്ടെടുക്കാനും ദൃഢനിശ്ചയത്തോടെ മുന്നേറാനുമായി കുട്ടികള്ക്കും മാതാപിതാക്കള്ക്കും ബോധവത്കരണ ക്ളാസ് നല്കി.വെന്മെനാട് എം.എ.എസ്.എം. വൊക്കേഷനല് ആന്ഡ് ഹയര് സെക്കന്ഡറി സ്കുളിലെ ഹയര് സെക്കന്ഡറി വിഭാഗം എന്.എസ്. എസ് യൂനിറ്റാണ് ക്ളാസ് സംടിപ്പിച്ചത്. മരത്തംകോട് ഓള് സെയ്ന്റ്സ് കോളജ് പ്രിന്സിപ്പലും ക്ളിനിക്കല് സൈക്കോളജിസ്റ്റുമായ എന്.വി.ആന്റണി ക്ളാസ് നയിച്ചു.വിദ്യാര്ഥികളുടെയും രക്ഷിതാക്കളുടെയും കഴിവുകളും പോരായ്മകളും സ്വയം തിരിച്ചറിഞ്ഞ് പുതിയ ചുവടുവെപ്പിനു ക്ളാസ് ഉത്തേജനമായി. ജീവിതത്തിലേറ്റ തിരിച്ചടികള് ഭാവിയില് വിലങ്ങുതടിയാകാതിരിക്കാന് ആത്മധൈര്യം വീണ്ടെടുത്ത് സ്വയം വിമര്ശനത്തിലൂന്നി മുന്നേറാന് സാധിക്കണമെന്നും അമിതസ്വാതന്ത്ര്യവും കുറ്റപ്പെടുത്തലുമല്ല പ്രോത്സാഹനവും നല്ല പഠനാന്തരീക്ഷവുമാണ് വിദ്യാര്ഥികളുടെ പ്രകടനം മെച്ചപ്പെടുത്തുന്നതെന്നും എന്. വി. ആന്റണി അഭിപ്രായപ്പെട്ടു. പ്രിന്സിപ്പല് കെ. ആര്. നസീബുല്ല അധ്യക്ഷത വഹിച്ചു. എന്. എസ്. എസ് പ്രോഗ്രാം ഓഫിസര് വിപിന് വി. വര്ഗീസ്, അധ്യാപകരായ കെ.പ്രസന്ന, പി. ജെ. പട്രീഷ്യ, ലിജി ജോര്ജ്, പി. ജോഫി ജോസ്, അനില് കെ. പാപ്പച്ചന്, സി. ബി. കനകലത, മേരി .കെ. സേവ്യര്, എന്നിവര് സംസാരിച്ചു.
പാവറട്ടി: പാവറട്ടി പ്രാഥമികാരോഗ്യ കേന്ദ്രം ‘ഓണാവധിയില്’. വ്യാഴാഴ്ച ആരോഗ്യകേന്ദ്രം തുറന്നുപ്രവര്ത്തിച്ചില്ല. ജീവനക്കാര് അവധിയിലായതാണ് കാരണം. എല്ലാ ജീവനക്കാരും ഒന്നിച്ച് അവധിയെടുക്കുകയായിരുന്നു. വരും ദിവസങ്ങളിലും ഇവര് അവധിയില് തന്നെയാണത്രേ. അതിനാല് ആശുപത്രിയില് ഒ.പി വിഭാഗം ഇനി എന്ന് തുടങ്ങുമെന്ന കാര്യത്തില് നിശ്ചയമില്ല. അടഞ്ഞുകിടക്കുന്നതറിയാതെ നിരവധിപേരാണ് ആശുപത്രി യിലെത്തി മടങ്ങിയത്.
ചാവക്കാട്: ദല്ഹി സ്ഫോടനത്തിന്െറ പശ്ചാത്തലത്തില് ചാവക്കാട് ബ്ളാങ്ങാട് കടപ്പുറത്തും ചാവക്കാട് നഗരസഭാ ബസ്സ്റ്റാന്ഡ് പരിസരത്തും ബോംബ് സ്ക്വാഡും ഡോഗ് സ്ക്വാഡും പരിശോധന നടത്തി. ഒന്നും കണ്ടെത്താനായില്ല. വ്യാഴാഴ്ച വൈകുന്നേരം ആറോടെ ചാവക്കാട് ബ്ളാങ്ങാട് കടപ്പുറത്ത് കയറ്റിയിട്ട വഞ്ചികള്ക്കിടയിലെല്ലാം പരിശോധന നടത്തി. പിന്നീട് നഗരസഭാ ബസ്സ്റ്റാന്ഡില് വാഹനങ്ങളുടെയും കടകളുടെ ഓരങ്ങളില് വൈകുന്നേരം 7.30 വരെ പരിശോധന തുടര്ന്നു.
