പാവറട്ടി: പുവ്വത്തൂരിലെ പാവറട്ടി പോലീസ് സ്റ്റേഷന് മുന്നിലുള്ള നാല് കച്ചവടസ്ഥാപനങ്ങളില് മോഷണം. കച്ചവടസ്ഥാപനങ്ങളുടെ പുറകുവശത്തെ ഓടിളക്കിയാണ് മോഷ്ടാവ് അകത്ത് കടന്നിട്ടുള്ളത്. പുവ്വത്തൂര് ചിരിയങ്കണ്ടത്ത് ജേക്കബിന്റെ പച്ചക്കറിക്കട, തിണ്ടിയത്ത് കുമാരന്റെ സ്റ്റേഷനറിക്കട, കരുമത്തില് വാസുവിന്റെ ഹോട്ടല്, പടയത്ത് അബ്ബാസിന്റെ കോഴിക്കട എന്നിവിടങ്ങളിലാണ് മോഷണം നടന്നിട്ടുള്ളത്.
ഓടിളക്കിയും ഭിത്തി തുരന്നും അകത്തുകടന്ന മോഷ്ടാവ് ടെലിഫോണ് കാര്ഡുകളും പണവും മോഷ്ടിച്ചു. നാലു കടകളില്നിന്നായി 5,000 രൂപയോളം നഷ്ടപ്പെട്ടതായി കണക്കാക്കുന്നു. കോലുക്കല് പാലത്തിനു സമീപം നിര്മ്മാണം നടക്കുന്ന രണ്ട് വീടുകളിലെ ഇലക്ട്രിക് വയറുകളും മുറിച്ച് കൊണ്ടുപോയിട്ടുണ്ട്. വ്യാപാരികള് പോലീസില് പരാതി നല്കി. പോലീസ് സ്റ്റേഷനു മുന്നിലെ നാലു കടകളില് ഒന്നിച്ച് മോഷണം നടന്നതോടെ വ്യാപാരികള് ഏറെ ഭീതിയിലാണ്. പോലീസിന്റെ രാത്രികാല പട്രോളിങ് ശക്തിപ്പെടുത്തണമെന്ന് പുവ്വത്തൂര് മര്ച്ചന്റ്സ് അസോസിയേഷന് ഭാരവാഹികളായ ടി.ആര്. രാധാകൃഷ്ണന്, വി.ജി. രാമചന്ദ്രന് എന്നിവര് ആവശ്യപ്പെട്ടു.
