പാവറട്ടി:പാവറട്ടി, മുല്ലശ്ശേരി, വെങ്കിടങ്ങ് മേഖലയില്‍ കനത്ത മഴയെത്തുടര്‍ന്ന് 200ഓളം വീടുകളില്‍ വെള്ളം കയറി. തൊയക്കാവ് കാളിയാമാക്കല്‍ തങ്ങഴിപ്പാടം മേഖലയിലെ പത്ത് കുടുംബങ്ങളെ മാറ്റി താമസിപ്പിച്ചു. മുല്ലശ്ശേരി കല്ലേരിക്കുന്ന് ഇടിഞ്ഞ് വീണ് ഒരു വീട് ഭാഗികമായി തകര്‍ന്നു.
പാവറട്ടിയില്‍ റോഡരികില്‍ കാനകളില്ലാത്തതിനാല്‍ ഗ്രാമീണ റോഡുകള്‍ വെള്ളക്കെട്ടിലായി. പലയിടത്തും നാട്ടുകാര്‍ പ്രതിഷേധവുമായി രംഗത്തെത്തി. പാവറട്ടി പുതുമനശ്ശേരി മസ്ജിദ് റോഡ്, എ.കെ.ജി.റോഡ്, തിരുനെല്ലൂര്‍ റോഡ്, കുണ്ടുവകടവ് റോഡ് എന്നിവിടങ്ങളില്‍ വെള്ളക്കെട്ട് രൂക്ഷമായതിനെത്തുടര്‍ന്ന് ഗതാഗതം തടസ്സപ്പെട്ടു. പാവറട്ടി പഞ്ചായത്തിന്റെ വിവിധ പ്രദേശങ്ങളിലെ നൂറോളം വീടുകളില്‍ വെള്ളം കയറി. വെങ്കിടങ്ങ് മുപ്പട്ടിത്തറ, തങ്ങഴിപ്പാടം, പൊതുശ്മശാനം പരിസരം എന്നിവിടങ്ങളിലെ നിരവധി വീടുകളില്‍ വെള്ളം കയറി. മുല്ലശ്ശേരിയില്‍ മാനിന-പറപ്പാടം റോഡരികിലെ മൂരാക്കന്‍ സദാനന്ദന്റെ വീടിന് മുകളിലേക്കാണ് ശനിയാഴ്ച രാത്രിയില്‍ കല്ലേരിക്കുന്ന് ഇടിഞ്ഞ് വീണത്. ടെറസ് വീടിന്റെ അടുക്കളഭാഗം ഭാഗികമായി തകര്‍ന്നു. വെങ്കിടങ്ങ് തങ്ങഴിപ്പാടത്തെ 10 കുടുംബങ്ങളെ വെള്ളം കയറിയതിനെത്തുടര്‍ന്ന് വെങ്കിടങ്ങ് പഞ്ചായത്ത് കമ്മ്യൂണിറ്റി ഹാളിലേയ്ക്ക് മാറ്റി പാര്‍പ്പിച്ചു.
No comments:
Post a Comment