ചാവക്കാട്:പാലയൂര്‍ എടപ്പുള്ളിയില്‍ ഒരു വീട്ടില്‍ മോഷണവും സമീപത്തെ മറ്റൊരു വീട്ടില്‍ മോഷണ ശ്രമവും നടന്നു. അഞ്ച് പവന്റെ സ്വര്‍ണ്ണാഭരണങ്ങളും 5000 രൂപയും നഷ്ടപ്പെട്ടു. നാലകത്ത് ഹനീഫയുടെ വീട്ടില്‍ നിന്നാണ് സ്വര്‍ണ്ണാഭരണങ്ങളും പണവും മോഷണം പോയത്. വീടിന്റെ പ്രധാന വാതിലിന്റെയും മറ്റ് മൂന്ന് ബെഡ്‌റൂമുകളുടെ വാതിലുകളുടെയും പൂട്ട് തകര്‍ത്താണ് മോഷ്ടാക്കള്‍ വീട്ടില്‍ കയറിയത്. ബെഡ്‌റൂമിനകത്തെ വസ്ത്രങ്ങള്‍ വാരിവലിച്ച് പുറത്തെറിഞ്ഞു. ഒരു അലമാരയില്‍ സൂക്ഷിച്ച സ്വര്‍ണ്ണാഭരണവും പണവുമാണ് കവര്‍ന്നത്. മൊബൈല്‍ ഫോണും കണ്ണടയും നഷ്ടപ്പെട്ടു.
ബന്ധുവിന് അസുഖമാണെന്ന് വിവരം ലഭിച്ചതിനെ തുടര്‍ന്നാണ് ഞായറാഴ്ച പുലര്‍ച്ചെ 1.30 ന് ഹനീഫ ഗുരുവായൂരിലെ സ്വകാര്യ ആസ്പത്രിയിലേക്ക് പോയത്. ഭാര്യയെയും ഉപ്പാപ്പയെയും, ഉമ്മയെയും സമീപത്തെ വീട്ടിലാക്കിയാണ് പോയത്. പുലര്‍ച്ചെ മൂന്നു മണിയോടെ തിരിച്ചു വന്നപ്പോഴാണ് മോഷണം നടന്ന വിവരം അറിയുന്നത്. പോലീസില്‍ വിവരമറിയിച്ചതിനെ തുടര്‍ന്ന് ചാവക്കാട് എസ്‌ഐ എം. സുരേന്ദ്രന്‍ സ്ഥലത്തെത്തി അന്വേഷിച്ചു. ഹനീഫയുടെ അയല്‍വാസിയായ പുതുവീട്ടില്‍ ഐസുമുവിന്റെ വീടിന്റെ പ്രധാന വാതിലിന്റെ പൂട്ടും കിടപ്പുമുറിയുടെ പൂട്ടും തകര്‍ത്താണ് മോഷ്ടാക്കള്‍ വീടിനകത്ത് കയറിയത്. കിടപ്പുമുറിയിലെ അലമാരയുടെ പൂട്ട് തകര്‍ത്തു. അലമാരയിലെ സാധനങ്ങള്‍ വാരിവലിച്ചിട്ടു. സ്വര്‍ണ്ണവും പണവുമൊന്നും നഷ്ടപ്പെട്ടില്ല. മകളുടെ വീട് മാറ്റത്തിനായി ഐസുമ്മുവും മകളും ശനിയാഴ്ച വീട് അടച്ചിട്ട് പോയതായിരുന്നു. ഞായറാഴ്ച രാവിലെ വീട്ടിലെത്തിയപ്പോഴാണ് മോഷണശ്രമം നടന്നതറിഞ്ഞത്. പോലീസില്‍ പരാതി നല്‍കി. വിരലടയാള വിദഗ്ധരെത്തി പരിശോധിച്ചു.
No comments:
Post a Comment