പാവറട്ടി:ഓണത്തിന് സര്‍ക്കാര്‍ അനുവദിച്ച വിവിധ പെന്‍ഷനുകള്‍ ഗുണഭോക്താക്കള്‍ക്ക് എത്തിച്ചുകൊടുക്കാതിരുന്ന എളവള്ളി പോസ്റ്റോഫീസിലെ ജീവനക്കാരെ കോണ്‍ഗ്രസ് പ്രവര്‍ത്തകര്‍ വ്യാഴാഴ്ച വൈകീട്ട് തടഞ്ഞുവെച്ചു. ആഗസ്ത് 28ന് പെന്‍ഷന്‍ തുകയും രേഖകളും പഞ്ചായത്ത് അധികൃതര്‍ പോസ്റ്റോഫീസ് അധികൃതര്‍ക്ക് കൈമാറിയിരുന്നു. എന്നാല്‍ കമ്പ്യൂട്ടര്‍ തകരാറെന്ന് പറഞ്ഞ് പെന്‍ഷന്‍ വിതരണം ചെയ്യാതിരുന്നതിനെത്തുടര്‍ന്നാണ് ഇത്.
തടയല്‍ ഒരു മണിക്കൂറോളം നീണ്ടു. ഇതിനിടെ പാവറട്ടി എസ്‌ഐ രാധാകൃഷ്ണനെത്തി ചര്‍ച്ച നടത്തിയെങ്കിലും ധാരണയിലായില്ല. തുടര്‍ന്ന് ഗുരുവായൂര്‍ അസി. പോലീസ് കമ്മീഷണര്‍ ആര്‍.കെ. ജയരാജും പോസ്റ്റല്‍ സൂപ്രണ്ട് ഹരീഷും എത്തി കോണ്‍ഗ്രസ് നേതാക്കളുമായി ചര്‍ച്ച നടത്തി. കമ്പ്യൂട്ടര്‍ തകരാറിലാണെങ്കിലും ശനിയാഴ്ച കഴിയാവുന്നത്രപേര്‍ക്കും പെന്‍ഷന്‍ നല്‍കാമെന്ന് കമ്മീഷണറും സൂപ്രണ്ടും ഉറപ്പ് നല്‍കിയതിനെത്തുടര്‍ന്ന് പ്രവര്‍ത്തകര്‍ സമരം നിര്‍ത്തിവെച്ചു. കോണ്‍ഗ്രസ് നേതാക്കളായ പ്രസാദ് വാക, ഷൈല മുഹമ്മദ്, സുന്ദരന്‍ കരുമത്തില്‍ എന്നിവര്‍ നേതൃത്വം നല്‍കി.
No comments:
Post a Comment