ചാവക്കാട്: തീരദേശമേഖലയില്‍ സ്വകാര്യബസ്സുകളുടെ അനിയന്ത്രിതവും അശാസ്ത്രീയവുമായ ഓട്ടം സ്ത്രീകള്‍ക്കും വിദ്യാര്‍ഥികള്‍ക്കും ദുരിതമാകുന്നു. ചാവക്കാട്-പുതുപൊന്നാനി, ചാവക്കാട്-മുനയ്ക്കക്കടവ്-അഞ്ചങ്ങാടി റൂട്ടുകളിലാണ് യാത്രക്കാര്‍ ദുരിതമനുഭവിക്കുന്നത്. ഈ റൂട്ടുകളില്‍ നിരവധി ബസ്സുകള്‍ക്ക് ഓടാന്‍ പെര്‍മിറ്റുകളുണ്ടെങ്കിലും വിവാഹങ്ങള്‍, വിനോദയാത്രകള്‍ എന്നിവയ്ക്ക് റൂട്ടുകള്‍ മുടക്കി പോകുന്നതുമൂലം പലപ്പോഴും ബസ്സുകള്‍ കിട്ടാറില്ല. രാവിലെ വിദ്യാര്‍ഥികളടക്കമുള്ള യാത്രക്കാര്‍ ബസ്സുകളുടെ കോണികളിലും ചവിട്ടുപടികളിലും കയറിനിന്ന് യാത്രചെയ്യുന്നതും പതിവുകാഴ്ച. ബസ്‌യാത്രക്കാരും ജീവനക്കാരും തമ്മില്‍ ഇടയ്ക്കിടെ വാക്ക്തര്‍ക്കവും സംഘര്‍ഷവും തീരമേഖലയില്‍ പതിവ്‌സംഭവമാണ്. കണ്‍സഷന്‍ നിരക്കില്‍ യാത്രചെയ്യുന്ന വിദ്യാര്‍ഥികളെ കയറ്റാന്‍ തയ്യാറാകാത്തതും പ്രശ്‌നങ്ങള്‍ക്ക് കാരണമാകുന്നുണ്ട്. തീരദേശമേഖലയില്‍ കെ.എസ്.ആര്‍.ടി.സി. ബസ്‌സര്‍വ്വീസ് കാര്യക്ഷമമല്ലാത്തതും ജനത്തെ ദുരിതത്തിലാക്കുന്നു. കെ.എസ്.ആര്‍.ടി.സി. ബസ്‌സര്‍വ്വീസുകളുടെ എണ്ണം ഈ മേഖലയില്‍ വര്‍ധിപ്പിക്കണമെന്നാണ് നാട്ടുകാരുടെ ആവശ്യം.
No comments:
Post a Comment