ചാവക്കാട്:ചാവക്കാട് നഗരസഭാ പ്രദേശത്ത് പാന്‍മസാല, ഹാന്‍സ്‌പോലുള്ള പുകയില ലഹരി വസ്തുക്കളുടെ നിരോധനം കര്‍ശനമാക്കാന്‍ നഗരസഭായോഗം തീരുമാനിച്ചു. ലഹരി വസ്തുക്കള്‍ പിടികൂടി നശിപ്പിക്കുകയും വില്‍പ്പന നടത്തുന്നവരെ പിഴയടപ്പിക്കുകയും ചെയ്യും. വഴിയോരക്കച്ചവടക്കാരായ തൊഴിലാളികളെ അംഗീകരിക്കുന്നതിന്റെ ഭാഗമായി സമിതി രൂപവല്‍ക്കരിക്കാനും, ഇവര്‍ക്ക് കച്ചവടത്തിനായി പ്രത്യേക സ്ഥലം അനുവദിക്കാനും യോഗം തീരുമാനിച്ചു. കച്ചവടക്കാര്‍ക്ക് രജിസ്‌ട്രേഷന്‍ നല്‍കും. നഗരസഭ മക്കൂട്ടക്കല്‍- പുന്ന റോഡിന്റെ നിര്‍മ്മാണത്തിനായി കെ.വി. അബ്ദുള്‍ഖാദര്‍ എം.എല്‍.എ. യുടെ പ്രാദേശിക വികസന ഫണ്ടില്‍ നിന്ന് 11,78,000 രൂപ അനുവദിച്ചതായി ചെയര്‍പേഴ്‌സണ്‍ കൗണ്‍സിലിനെ അറിയിച്ചു. നഗരസഭ എട്ടാം വാര്‍ഡില്‍ താമരയൂര്‍ സ്‌കൂള്‍ റോഡിനെയും കോണ്‍വെന്റ് റോഡിനെയും ബന്ധിപ്പിക്കുംവിധം പുതുതായി റോഡ് നിര്‍മ്മിക്കും. ചെയര്‍പേഴ്‌സണ്‍ എ.കെ. സതീരത്‌നം അധ്യക്ഷയായി. എം. ആര്‍. രാധാകൃഷ്ണന്‍, മാലിക്കുളം അബ്ബാസ്, കെ.എം. അലി, കെ.കെ. കാര്‍ത്ത്യായനി, കെ.കെ. സുധീരന്‍, കെ.വി. സുരേഷ്‌കുമാര്‍, പി. യതീന്ദ്രദാസ്, കെ.വി. ഷാനവാസ്, അഡ്വ. ഇ.എം. സാജന്‍ എന്നിവര്‍ ചര്‍ച്ചകളില്‍ പങ്കെടുത്തു.
No comments:
Post a Comment